| Bluetooth ne PDF |
a
 | |
Rai
Uno, një dokumentar për jetën e Adelinës
|
| Shkrime
te tjera tek faqet |
|
| | 08/01/2007
- 10:06
•
Vetëm
pak kohë më parë, në faqet e Gazetës do të tregohej historia e
Adelinës. Vajza durrsake që i shpëtoi prostitucionit, tashmë ka
ngritur në Itali një qendër rehabilitimi për viktimat e trafikut.
Historia vazhdon edhe më tej. Gjithçka që ka ndodhur në jetën e saj,
do të "preket" nga afër nga një publik i gjerë. Stacioni italian Rai
Uno, ka marrë përsipër realizimin e një filmi dokumentar mbi
historinë e Adelinës. Ndonëse ky nuk është emri i vërtetë i saj, ai
personifikon të gjitha ato vajza që janë shfrytëzuar nëpër trotuaret
e Italisë. Adelina tregon se xhirimet e filmit kanë mbaruar që në
datën 19 dhjetor dhe pritet që të transmetohet këtë muaj në Rai Uno.
Për realizimin e tij është angazhuar stafi i programit "Il Bivio"
dhe kuestura e Varesës, ku Adelina ka gjetur mbështetje dhe
mbrojtje, pas denoncimit që iu ka bërë tutorëve të saj. Përshkrimi
nis që në fëmijërinë e Adelinës. Atëherë kur ajo bënte një jetë
normale si të gjithë fëmijët e tjerë. Por jeta e saj do të merrte
kthesë 10 vjet më parë. Ajo rrëmbehet, dhunohet dhe detyrohet të
prostituojë për tutorët në Itali. Janë pikërisht këto vite, ku
mëshon më shumë filmi dokumentar. Në bashkëpunim me kuesturën e
Varesës, është improvizuar momenti i rrëmbimit të Adelinës, torturat
e shumta që ka vuajtur, duke u shitur nga një dorë në tjetrën dhe
deri në arrestimet që u bënë pas denoncimit të saj. Ky film
dokumentar nuk synon të tregojë thjesht historinë e një të
trafikuare. Nëpërmjet ngjarjes së Adelinës, e cila gjeti forcën të
denonconte dhe të shkëputej nga jeta e "rrugës", kërkohet të bëhet
një sensibilizim për të gjitha ato vajza që ngurrojnë të denoncojnë,
ngurrojnë të tregojnë historinë e tyre dhe jetojnë nën shtrydhjen e
tutorëve. "Këtë film ia dedikoj të gjitha Adelinave, të gjitha
vajzave që ndodhen në rrugët e Italisë, të gjitha vajzave që kanë
denoncuar dhunuesit e tyre, ashtu siç bëra unë. Por ky film i
dedikohet edhe policisë e karabinierëve italianë, në veçanti Luigi
Manco dhe kapitenit Mario Tusa, të cilët kanë shpëtuar shumë vajza
nga kthetrat e trafikut", - shprehet Adelina.
Spoti
Adelina e ka rrëfyer historinë e jetës së saj nëpër
shumë studio televizive italiane, nëpër emisione radiofonike, si dhe
faqe gazetash kanë shkruar dëshminë e saj. Së fundmi edhe një film
dokumentar që do të shfaqet në Rai Uno. E pavarësisht të gjithave që
kanë ndodhur, Adelina tani bën një jetë të lirë. Por së fundmi, e
angazhuar edhe në luftën kundër trafikut të femrave. Këto ditë ajo
do të xhirojë edhe një spot kundër dhunimit dhe trafikimit, që do të
transmetohet pothuajse në të gjitha stacionet radiofonike italiane.
Në këtë spot, Adelian u bën apel të gjitha femrave që detyrohen të
shesin trupin e tyre dhe të mbushin xhepat e tutorëve, të gjejnë
guximin të denoncojnë në emër të një jete të lirë. "Liri dhe
Ligjshmëri" janë fjalët që tingëllojnë brenda meje, Bëhu si unë, një
grua e lirë dhe e respektuar; si qenie njerëzore bërtit bashkë me
mua me zë të lartë: "Lërmëni, dua lirinë time". Ky është një pjesë
nga teksti që pas disa ditësh do të dëgjohet në spotin e
sponsorizuar nga kisha dhe nga radio "Zëri i shpresës".
Historia
Historia e saj do të niste 10 vjet
më parë. Adelina, një vajzë nga Durrësi do të rrëmbehej, dhunohej
dhe pastaj do të trafikohej në trotuaret e Italisë. Në trupin e saj
do të provonte torturat çnjerëzore të njerëzve që do të shfrytëzonin
trupin e saj për të fituar milionat. Do të gëlltiste turpin, mohimin
e familjes, do të duronte cigaret që i fikeshin në trup, apo të
çarat që do ta detyronin të mbyllte gojën. Të gjitha këto, Adelina i
tregon pasi ka shpëtuar nga trotuaret e Italisë. Ajo mori guximin të
denonconte në polici tutorët e saj dhe të fillonte një jetë të lirë.
Që nga ajo kohë nuk është kthyer asnjëherë në Shqipëri. Prej pak
kohësh ka ngritur në Itali një qendër rehabilitimi për gratë e
dhunuara, e cila do të presë vizitoret e para. Historinë e saj e ka
treguar edhe në dy libra, "Libera" (E lirë) "Adelina, e lirë nga
prostitucioni". Botime të cilat kanë arritur shifra të mëdha. Pritet
që së shpejti të vijë në Tiranë, në një seminar kundër trafikimit.
ol. li.
Kthehu
mbrapa |
|
|